聖保羅殘陣難敵彭美拉斯

　　巴西盃新科冠軍彭美拉斯，周一清晨會喺巴甲主場迎戰聖保羅，雖然主隊仍處降班區域，不過憑佢哋捧盃嘅餘威，絕對有能力擊敗殘陣出擊嘅聖保羅，平手盤一於撐主隊！

　　彭美拉斯雖則暫列巴甲第18位，好近排喺主場嘅戰績總算出現攀升，近8次喺自己地頭出戰，就有7場保持不敗，而且食住啱啱贏咗巴西盃個勢，今場對住作客戰績一般嘅聖保羅，絕對有能力再下一城。

　　彭美拉斯今仗係就係有射手盧恩盧沙同比天奴有傷唔出得，但仲有主力巴高斯可以擔大旗，火力得以保持。至於年底就約滿嘅教練史高拉利仲諗緊續唔續約，話睇吓有冇國隊向佢招手喎，但相信暫時對軍心影響唔大。