新特蘭態沉讓唔起

　　英國名帥夏利列納正式成為英超包尾大幡昆士柏流浪教頭，首戰揮軍北上作客新特蘭，QPR季初戰績曳到唔恨，陣改由夏利叔領軍，可以抹晒啲績由頭計過。呢位老帥最叻幫班失意軍人重拾信心，上場未正式上任班兵已經踢得醒神，今戰預期會有進步演出，信夏利叔，要「讓球客勝」！

　　夏利列納能夠執住樸茨茅夫班失意軍人贏足總盃，唔係個個都得，當佢離開樸茅去熱刺，班波即時出事，熱刺今夏無啦啦炒佢魷，依畀少帥保亞斯舞到亂晒龍，反映呢位老帥並非浪得虛名。夏利叔喺當地球圈有番咁上下江湖地位，現時QPR隊內充斥施薩索拉斯、保辛華及施斯等過氣球星，要令佢哋為球會賣命唔易，但夏利叔就係有咁嘅本事！「黑貓」近況都好曳，喺光明球場錄得3連敗，上場鬥西布朗搏輸打沉士氣，讓波信唔過！

　　昆士柏流浪季初深陷谷底，某程度上同教頭曉士轉會策略有關，球會有心大搞，佢季前買入大批新兵正，但都唔好一鑊過前中後三線大執位嘛，變得太多太快，搞到有反效果，造成聯賽13戰不勝災難局面，老細費爾南德斯郁得佢遲啦！夏利列納接手爛攤子，一切還原基本步，上場鬥曼聯雖為座上客，但已落柯打重用戴亞、占美麥基同泰拉拔等舊將，班波喺奧脫福頂到半場，換邊後仲一度領先，已經好叻o架喇，就算輸波都有交代。