多蒙特留力歐聯讓唔起

　　周中兩場歐聯4強，全世界都已經見識到德甲水平有幾高！唔只拜仁慕尼黑勁，多蒙特都有番咁上下。佢哋主場4:1大炒皇馬德里後，今晚返到聯賽作客弱旅杜塞爾多夫，牌面睇贏足九條街，不過足球又唔係加減數咁簡單嘅，主隊依為護級搏老命，相反多蒙特聯賽無欲無求，隨時留力下星期作客巴拿貝嘅歐聯次回合，杜塞爾多夫有機會搶到分，2.2倍「讓球主勝」值博！

　　排聯賽次席嘅多蒙特領先第3位嘅利華古遜8分咁多，就算真係唔好畀人過頭，其實第2同第3位都有得踢下屆歐聯，保唔保得住次席似乎唔係最緊要，依高普同佢班兵唯一目標，應該放晒响歐聯決賽，預料高普會收起主力，就算主力有份落場都會就住踢，佢哋寧願失分，都唔願見到球隊增添任何一個傷兵啦！今場「例行事」，小弟覺得真係無把握「蜜蜂兵團」可以作客贏到波囉！

　　杜塞爾多夫依排聯賽尾4，只係多尾2嘅賀芬咸6分，距離要踢護級附加賽嘅尾3位置更只得3分，嚟緊4場波唔搏唔得！提一提你，原來杜塞爾多夫近10場主場聯賽只係輸過2場，有5勝3和強勁戰績支持，今晚主場對住無心戀戰嘅「蜜蜂仔」，成功搶分機會真係唔細o架！