俄羅斯凍瓜葡軍

　　世界盃外圍賽今晚戰火重燃，F組雙巨頭俄羅斯同葡萄牙將會正面對撼。俄羅斯「作反孖寶」丹尼素夫同基沙哥夫喺辛尼特被冷落，難得繼續獲國睇重，今鋪仲唔一鑊過吐烏氣咩？喺凍到飛起嘅莫斯科有望做低葡萄牙力爭小組3連捷，平手盤當然捧俄羅斯。

　　俄羅斯班霸辛尼特今季大搞，偏偏丹尼素夫同基沙哥夫就眼紅侯克同韋素兩位「貴價新兵」，嗌加人工失敗後決定罷操，卒之喺上月底畀教練史巴列堤貶落預備組。堂堂國腳要跟住班青年軍練波，唔火就有鬼啦，好在俄羅斯領隊卡比錫住兩位辛尼特球星，今次鬥葡萄牙亦繼續徵召佢兩個入伍，谷埋谷埋成肚火，丹尼素夫同基沙哥夫肯定想搵葡萄牙出氣。

　　查實自從卡比上任之後，俄羅斯嘅演出都好穩定，F組頭兩場分組賽就輕鬆砌低北愛爾蘭同以色列兼保持零失球，走勢咁好，卡比都費事執陣容，繼續唔揀施哥夫、艾沙維、普格恩耶克同柏夫里約真高呢幾位大牌，證明佢老人對砌低葡萄牙信心十足。

　　同俄羅斯一樣喺F組兩戰全勝嘅葡萄牙，日前喺里斯本操咗3課，當中般奴艾維斯就向記者話和波都收貨喎！呢位中堅咁保守又唔係冇道理，皆因C朗喺「國打吡」打倒掛整傷左肩，雖然日前獲皇馬批准可以為葡萄牙披甲，但佢同左腳大腿肌肉有傷嘅比比就齊齊缺席首課國隊操練，比比仲話自己嘅上陣機會只係五五波，證明傷勢唔輕喎！

　　據《球報》透露，葡萄牙大軍前晚啟程出發後，唔少球星喺飛機上面凍親搞到傷風，仲話強勁氣流搞到幾位國腳唔舒服，都唔知會唔會影響表現。仲有，今場波會喺莫斯科斯尼基球場舉行，俄羅斯足總只係預留200張作客波飛配額畀葡萄牙球迷，實行人多蝦人少，聲勢都贏你成條街，呢場波撐俄羅斯有着數呀！